လါယူၤ ၃သီ၊၂၀၂၆နံၣ်
ကညီကီၢ်စဲၣ် ရၤမတံကလံၤထံး KNAကညီတၢ်မုၣ်တၢ်ခုၣ်ကရူၤဒိၣ်စိ စွ့ၣ်ကိးကိၣ်ဝ့ၢ်တကပၤ ပှၤမၤတရူးကၠါဖၠဲးတဖၣ် သုးဃီၢ်လီၢ်ကျဲဆူ DKBA BGFပၢဟီၣ်ကဝီၤတဖၣ်တကပၤန့ၣ်လီၤ။
ဖဲအပူၤကွံၥ်လါမ့ၤအတီၢ်ပူၤ စွ့ၣ်ကိးကိၣ်ကၠါဖၠဲးတၢ်မၤပူၤ ပှၤမၤတၢ်ဖိအဂၤ ၁၀၀ဘျဲၣ် စးထီၣ်ဖဲလါမ့ၤ၂၅သီသုးဃီၢ်ဝဲဆူ DKBAပၢ ကၠီးခဲးသဝီန့ၣ် ဖလူ ဝီၤလ့ၤကျဲ အ့ၤကၠ့မၠဲၣ်သဝီတၢ်ကစီၣ်ဂံၢ်ခီၣ်ထံးစံးဝဲလီၤ။
တကီၢ်ခါအသီတဖၣ်ပူၤတၢ်ကစီၣ်ဟးထီၣ်လၢပယီၤသုးမၤဟးဂီၤဝဲ စွ့ၣ်ကိးကိၣ်ဝ့ၢ်ပူၤ တၢ်သူၣ်ထီၣ်အဖျၢၣ်၃၀ဘျဲၣ်ဝံၤအလီၢ်ခံ ပှၤလၢမၤတၢ်မၤဖဲန့ၣ်တဖၣ် သုးဃီၢ်လီၢ်ကျဲဒီးသိလ့ၣ်တဖၣ်ဆူကၠီးခဲးသဝီတကပၤန့ၣ်တၢ်ကစီၣ်ဂံၢ်ခီၣ်ထံးစံးဝဲလီၤ။
“ဖဲ၂၄သီ၂၅သီအနံၤန့ၣ်တၢ်ကစီၣ်နုၥ်လီၤလၢ DKBAပူၤ ကိးကိၣ်ပူၤတရူး၁၀၀ဘျဲၣ်ကသုးဝဲဆူကၠီးခဲးန့ၣ် ဖဲမုၣ်ထူၣ်န့ၣ်ပထံၣ်သိလ့ၣ်သၢခိၣ်လွံၢ်ခိၣ်တီၤတၢ်ဝံၤသုးဃီၢ်ဝဲလီၤ ကိိးကိၣ်ဆူရၤမတံ လဲၤခီဖျိပယီၤသုးတြဲၤBGD တြဲၤ ဖဲန့ၣ်တဆီမဲးထီၣ်သလ့ဆူ ကၠီးခဲးတကပၤ “န့ၣ်ပှၤလၢဘူးဒီး DKBA အ့ကၠ့မၠဲၣ်သဝီတၢ်ကစီၣ်ဂံၢ်ခီၣ်ထံးစံးဝဲလီၤ။
တကးဒံးဘၣ်စွ့ၣ်ကိးကိၣ်သဝီဆူ ဃိၣ်သၢဖျၢၣ်တကပၤ သုးဃီၢ်လီၢ်ကျဲ ဖဲကိတဲၤ-နိၣ်တကီကျဲဒီး ဖၣ်အၣ်-ကၠဲးမယီကျဲဆူ စိၤဆှၢပှၤမၤတရူးကၠါဖၠဲးတၢ်မၤတဖၣ်ဒီးလူၢ်ပျဲၢ်ကီၢ်ဆၣ် ပၢချၢ တီနီၢ်ကစၢၢ်ခီၣ်ထံးသဝီကျဲတကပၤ သုးဃီၢ်ဝဲအိၣ်န့ၣ် ပှၤနီသိလ့ၣ်လၢရၤမတံ BGF KNA သုးပူၤတဖၣ်စံးဝဲအသိးသ့ၣ်ညါဘၣ်လီၤ။
“ကၠါဖၠဲးတရူးတဖၣ်မ့သုးဃီၢ်အလီၢ်န့ၣ်ပဘၣ်ဆှၢ လၢပှၤမၤဟးဂီၤ KK Park အခါ ဘၣ်ဆှၢဆူသ့းကတ့ၤ လူၢ်ပျဲၢ်တကပၤ အခဲပှၤကဖှီၣ်လၢကိးကိၣ် ရၤမတံအဃိ ဘၣ်ဆှၢဆူကၠီးခဲး ဃိၣ်သၢဖျၢၣ် ဖၣ်အၣ်တကပၤ BGF KNA မ့ကိးန့ၣ်ပဘၣ်လဲၤနီန့ၣ်သိလ့ၣ်အိၣ် ပလဲၤလၢကရူၤကရၢသိလ့ၣ်ကျိၤအဃိ ပယီၤသုးတြဲၤပခီန့ၣ်လီၤ”စံးဝဲလီၤ။
တၢ်သုးဃီၢ်လီၢ်ကျဲဒ်အံၤန့ၣ်မ့ၢ်လၢ ပယီၤသုးတဖၣ် ကထုးထီၣ်တၢ်ဘျၢ ဒီးကဟံန့ၣ်အရ့လၢတၢ်လီအီၣ်စ့တၢ်မၤတဖၣ်အဃိန့ၣ်ပှၤလၢဘူးဒီးအဝဲသ့ၣ်တဖၣ်စံးဝဲလီၤ။
ဘၣ်ဃးဒီး KNA ကညီဖှီၣ်စုကဝဲၤဟီၣ်ကဝီၤပူၤတရူးကၠါဖၠဲးတဖၣ်သုးဃီၢ်လီၢ်ကျဲဆူ DKBA/BGF/KNA ဟီၣ်ကဝီၤပူၤတဖၣ် ပဆဲးကျိးသံကွၥ်ဆူ ပှၤဘၣ်မူဘၣ်ဒါတဖၣ်အိၣ်နၥ်က့ တၢ်စံးဆၢတန့ၣ်ဒံးဘၣ်။
တကီၢ်ခါခဲအံၤ ရၤမတံ စွ့ၣ်ကိးကိၣ်လီၢ်ကဝီၤပူၤ ပယီၤသုးမၤဟးဂီၤကၠါဖၠဲးတၢ်သူၣ်ထီၣ်တဖၣ်နၥ်က့ ဖှီၣ်တဲကၠါဖၠဲးတရူးသ့ၣ်ခိၣ်ဒီးပှၤမၤတၢ်ဖိတဖၣ် ဝံၤ ပၢၤဃၥ်ဝဲတၢ်ဖိတၢ်လံၤဘၣ်ဃးဒီးကၠါဖၠဲးတဖၣ်တအိၣ်န့ၣ် ပှၤလၢအိၣ်ဆိးလၢစွ့ၣ်ကိးကိၣ်ပူၤတဖၣ်စံးဝဲလီၤ။
