ဩဂုတ် ၁၁၊ ၂၀၂၆
ထိုင်းနိုင်ငံ စံခလဘူရီဘက်မှ မြန်မာနိုင်ငံ၊ဘုရားသုံးဆူမြို့ DKBA ထိန်းချုပ်နယ်မြေထဲမှာ လုပ်ငန်း တွေ အဆင်ပြေလည်ပတ်လို့ရတာကြောင့် ကြာအင်းဆိပ်ကြီးမြို့ဘက်သွားတဲ့လမ်းပိုင်းက ကျေးရွာတွေဘက်အထိ တရုတ်ကျားဖြန့်ငွေလိမ်ဂိုဏ်းနေရာ ေရွှ့ပြောင်းလုပ်ကိုင်လာမှု မြင့်တက်လာနေပါတယ်။
ထိုင်း-မြန်မာနယ်စပ်၊မြဝတီမြို့ဘက်က DKBA ကျောက်ခက်ကျေးရွာက တရုတ်ကျားဖြန့်ငွေလိမ်ဂိုဏ်းနေရာတွေ ရွှေ့ပြောင်းပေးရတာမှာ လုပ်ငန်းနဲ့လူစုခွဲ ဖြန့်ကျက်လုပ်ကိုင်ဖို့ နေရာေရွှ့ပြောင်းပေးနေရတာမှာ ဘုရားသုံးဆူမြို့ဘက်က DKBAတပ်နယ်၂ တပ်နယ်မှူးစောအေဝမ်းရဲ့ထိန်းချုပ်နယ်မြေနေရာတွေမှာ ရေမီး၊ ဝိုင်ဖိုင်၊ အင်တာနက်လိုင်းတွေ အဆင်ပြေလို့ နေရာေရွှ့ပြောင်းလာနေကြတာလို့ အခြေအနေသိတဲ့သတင်း အရင်းအမြစ်က ပြောပါတယ်။
” ဗိုလ်အေဝမ်း ရေတံခွန်တို့၊ထီးလောင်ယှူး ရေတံခွန်တို့၊တိုင်တစ်ရာကျောင်းဘက်တို့ ခြံဝင်းနေရာတွေမှာ တရုတ်တွေပြည့်နေပြီ၊အခုကထီးခိုင်ရွာဘက်၊ ကြိမ် ချောင်းရွာဘက်တွေကို နေရာသစ်တွေဆောက်ပြီး လူဖြန့်ခွဲပို့ပေးနေတယ်၊အဆောက်အဦးပြီးတာနဲ့ လူပို့တယ်၊လုံခြုံရေးချတယ်၊စားရေးသောက်ရေး၊ရေမီး၊လျှပ်စစ်၊အင်တာနက်အကုန်တပ်ဆင်ပြီး အလုပ်လုပ်နေကြတာ အဆင်ပြေတော့ ကျားဖြန့်တွေ ပြောင်းလာကြတာမျိုး ရှိတယ်” လို့ပြောပြပါတယ်။
ဒါ့အပြင် အဲဒီတရုတ်ကျားဖြန့်လုပ်ငန်းတွေမှာ အလုပ်သမားအဖြစ်လုပ်ကိုင်ကြတဲ့ တရုတ်နိုင်ငံသားအပါအဝင် နိုင်ငံခြားသားတွေအတွက် အစားအသောက်အသုံးအဆောင်နဲ့ နိုင်ငံခြားအရက်ဘီယာ၊ ဇိမ်ခံပစ္စည်း၊ ဆေးဝါးတွေကိုလည်း ထိုင်းဘက်၊ မြန်မာဘက်က မှောင်ခိုလုပ်ငန်းရှင်တွေနဲ့ ချိတ်ဆက် ရောင်းဝယ် ပို့ဆောင်ပေးနေတာကြောင့်
ငွေလိမ်လုပ်ငန်းတွေ လည်ပတ်လုပ်ကိုင်လို့ အဆင်ပြေနေကြတယ်လို့ သိရပါတယ်။
” တရုတ်ကျားဖြန့်တွေ ရောက်လာတာ သုံးဆူမှာတော့ မှောင်ခိုစီးပွားရေးကောင်းလာတယ်၊ ထိုင်းစက်သုံးဆီ၊ ကျားဖြန့်အတွက် ဘန်ကောက်ကတစ်ဆင့် ပို့လာတဲ့တန်ဖိုးကြီးအစားအသောက်၊ အရက်ဘီယာနဲ့ ဇိမ်ခံပစ္စည်းတွေ သုံးဆူဘက်ထဲကို သယ်ရ၊ပို့ရတာ သူချိတ်နဲ့သူအလုပ်ဖြစ်နေကြတယ်၊ အပြင်ထွက်သွားလာလို့မရတာတစ်ခုဘဲ၊ကျားဖြန့်နေရာတွေမှာ လိုခြင်တာအကုန်မှာလို့ သုံးလို့ရအောင် လုပ်ပေးထားတယ်” လို့ကျားဖြန့်ဆိုဒ်မှာ ကားမောင်းတဲ့ဝန်ထမ်းကပြောပြပါတယ်။
အဲ့ဒီလို တရုတ်ကျားဖြန့်ငွေလိမ်လုပ်ငန်းတွေ ထိုင်း-မြန်မာနယ်စပ်အနီးနေရာတွေကနေ ကရင်ပြည်နယ်ထဲက တောင်တန်း၊ တောအုပ်နဲ့ လျှိုမြှောင်တွေဘက်ကို နေရာေရွှ့ပြောင်းလုပ်ကိုင်နေကြပြီး DKBA တပ်ဖွဲ့အစောင့်အရှောက်နဲ့ လုံခြုံရေးချထားလုပ်ကိုင်နေတာကြောင့် ဒေသခံကျေးရွာသားတွေ အဲ့ဒိီနေရာတွေဘက်သွားလာတာနဲ့ အလုပ်လုပ်ကိုင်ခွင့်ကိုတော့ DKBA တပ်ဖွဲ့တွေက ပေးမလုပ်ဘူးလို့ သိရပါတယ်။
အခုလို တရုတ်ကျားဖြန့်ငွေလိမ်လုပ်ငန်း၊လူကုန်ကူးအဓမ္မအလုပ်ခိုင်းစေတဲ့လုပ်ငန်းတွေကို လုပ်ကိုင်နေတဲ့ DKBA တပ်ဖွဲ့ဟာ အာဏာသိမ်းစစ်တပ်အုပ်စုနဲ့ အပစ်ရပ်လက်မှတ်ထိုးတာကြောင့် နိုင်ငံတစ်ကာအသိုက်အဝန်းက ကျားဖြန့်ဂိုဏ်းတွေ နှိမ်နင်းဖမ်းဆီးတာမျိုးလုပ်နေပေမယ့် ကရင်ပြည်နယ်ဘက်က ကျားဖြန့်လုပ်သူတွေကို စစ်အုပ်စုနဲ့ DKBA တပ်က ထိုင်းနိုင်ငံက တစ်ဆင့် နေရပ်ပြန်ပို့တာကလွဲလို့ ဖမ်းဆီးအရေးယူတာမျိုး အခုအချိန်အထိ့လုပ်ဆောင်တာမျိုးမရှိသေးပါဘူး။