လါယူၤ ၁၆သီ၊၂၀၂၆နံၣ်
ကညီကီၢ်စဲၣ် ဖၣ်အၣ် ၊ရၤမတံ ၊ကီးတရံး၊ကြုၢ်တု၊ဃိၣ်သၢဖျၢၣ်၊နိၣ်တကီကီၢ်ဆၣ်တဖၣ်ပူၤ ကသံၣ်မူၤဘှီးဘ့ၣ်ဘၣ် (Methamphetamine) ကသံၣ်ကသ့ၣ်ဘ့ၣ်ဘၣ်တဖၣ်အပှ့ၤလီၤဆှၤဒီးပှၤဆါအါထီၣ်အဃိပှၤပှ့ၤသူနၥ်က့အါထီၣ်န့ၣ်ပဆဲးကျီးသံကွၥ်လီၢ်ကဝီၤသဝီတဖၣ်ဆၢကတီၢ်သ့ၣ်ညါဘၣ်လီၤ။
တကီၢ်ခါခဲအံၤပဆဲးကျီးသံကွၥ်ဆူ ကီးတရံး၊ကြုၢ်တု၊နဘူ လီၢ်ကဝီၤဖိတဖၣ်ဘၣ်ဃးဒီးကသံၣ်မူၤဘှီးအါထီၣ်တၢ်အိၣ်သးန့ၣ် “ကြုၢ်တုနဘူတကပၤန့ၣ်ပှၤရၤလီၤတၢ်န့ၣ်ပှၤဖှီၣ်စုကဝဲၤတဖၣ်လီၤ ပှၤဆါန့ၣ်တဖျၢၣ်အိၣ်ဒၣ်၅၀၀ လၢအဂ့ၢ်န့ၣ် ၈၀၀၊၁၀၀၀ ပှၤသူကသံၣ်ကသ့ၣ်ခဲလၢၥ်လီၤ အဝဲသ့ၣ်ဆါ အဝဲသ့ၣ်က့ၤဖှီၣ်ပှၤလၢသူတဖၣ် ဟံန့ၣ်စ့ဝံၤပျဲလီၤက့ၤဝဲ”န့ၣ်ကြုၢ်တု ခၠီဖၠါသဝီလီၢ်ကဝီၤဖိစံးဝဲလီၤ။
ပှၤလၢရၤလီၤကသံၣ်မူၤဘှီးအါတက့ၢ်အံၤ ပှၤလၢပတူၤတၢ်ခးဒီးပယီၤသုး ကညီဖှီၣ်စုကဝဲၤသုးခိၣ်တနီအိးထီၣ် တၢ်လိၥ်ကွဲလီၢ်၊အၣ်ဝၣ်တ့၊ကျးတဖၣ်ဒီးသံကျးတဖၣ်ဆါလီၤဝဲအိၣ်အသိးပှၤဟးဆါဒီးသိလ့ၣ်တဖၣ်နၥ်က့အိၣ်န့ၣ်သ့ၣ်ညါဘၣ်လီၤ။
တကးဒံးဘၣ်ရၤမတံ ဖၣ်အၣ်ဝ့ၢ်တဖၣ်တကပၤ ပယီၤသုးဟံန့ၣ်ထံကီၢ်စိကမီၣ်ဝံၤအလီၢ်ခံ night club၊သံဘါတဖၣ်၊KTV၊သံးကျးတဖၣ်ကညီဖှီၣ်စုကဝဲၤတဖၣ် ပှၤမၤမုၢ်ကျိၤဝဲၤကွၢ်ပယီၤသုးဝဲၤဒၢးခိၣ်နၣ်တဖၣ်ဒီးသုးခိၣ်တဖၣ်ပၥ်ဖှိၣ်လိၥ်သးဝံၤမၤဝဲတဖိးသဲစးဒီးထံကီၢ်တၢ်ဘျၢတၢ်မၤတဖၣ်န့ၣ်လီၤ။
တၢ်လီၢ်တဖၣ်န့ၣ်အပူၤဟ့ၣ်တၢ်ခွဲးတၢ်ယၥ်လၢကသူဝဲကသံၣ်မူၤဘှီးဒီးကျးပှၤမၤတၢ်ဖိတဖၣ် ၊ကျးကစၢ်တဖၣ်ဒီးပယီၤသုးခိၣ်နၣ်တဖၣ် အီမူၤအီဘှီးအါထီၣ်န့ၣ်ဝ့ၢ်ခိၣ်တၢ်ကစီၣ်ဂံၢ်ခီၣ်ထံးတဖၣ်စံးဝဲလီၤ။
“ရၤမတံဖၣ်အၣ်ပယီၤသုးခိၣ်နၣ်တဖၣ်ဖဲအဘၣ်သးန့ၣ်မၤဝဲန့ၣ်အဃိ ပှၤအိးထီၣ်club barတဖၣ်အါထီၣ်လီၤ ပှၤအီၣ်အိတဖၣ်နၥ်က့အိၣ်ဒၣ်ပှၤဘူးဒီးပယီၤသုးလီၤတၢ်မူၤတၢ်ဘှီး ဟဲဒၢး ကျးခဲလၢၥ်န့ၣ်အိၣ်ဒၣ်ပယီၤသုးခိၣ်နၣ်တဖၣ်အတၢ်လီၤ”န့ၣ်စံးဝဲလီၤ။
တကီၢ်ခါခဲအံၤ ပယီၤသုးမၤဝဲတၢ်ဖးလၢတဖိးသဲစးဒီး ရဲၤကျဲၤဝဲအသီတကယၤ အပူၤ တၢ်ဒုးကဲထီၣ်သဝီဟးဂီၤဝ့ၢ်ဟးဂီၤတဖၣ် မၤဝဲထံဖိကီၢ်ဖိလံၥ်အုၣ်သးဒီးကမျၢၢ်ပၥ်ဖှိၣ်တၢ်အိၣ်ဖှိၣ်တဖၣ်နၥ်က့ ဟ့ၣ်တၢ်ခွဲးတၢ်ယၤလၢ တၢ်အီမူၤဘှီးတဖၣ် မုၢ်ကျိၤဝဲၤကွၢ်လၢတဖိးသဲစးတဖၣ်ဒီးတၢ်အီၣ်အခိအသွဲတဖၣ်န့ၣ်လီၤ။
ကညီကီၢ်စဲၣ်ပူၤ ကသံၣ်မူၤဘှီးအါထီၣ်ဒီးပှၤပှ့ၤဆါအါထီၣ်တၢ်အိၣ်သးအဖီခိၣ် ဟဲရၤလီၤသးတုၤလၢပှၤပၢၤဆၢပယီၤသုးမီၤစိရိၤ တၢ်ပၢၢ်ဆၢဟီၣ်ကဝီၤတဖၣ်ပူၤအဃိ တုၤလၢ KNU/KNLA သုးက့ဟီၣ်ကဝီၤတဖၣ်အပူၤဒီးပှၤသူအါထီၣ်န့ၣ်ပှၤလၢသ့ၣ်ညါတၢ်အိၣ်သးတဖၣ်စံးဝဲလီၤ။
“အခဲလၢဃိၣ်သၢဖျၢၣ်တကပၤ ကသံၣ်ကသ့ၣ်တဖျၢၣ် မ့ဂ့ၢ်န့ၣ်ဂ့ၢ်အသိးတဖျၢၣ်အိၣ်လၢ ၅၀တုၤလၢ ၆၀/၇၀/၈၀လီၤ ဖဲန့ၣ်တကပၤသုးတဖၣ်ဆါဝဲသူဝဲ ကမျၢၢ်နၥ်က့သူကသံၣ်အါထီၣ် တၢ်ပၢၢ်ဆၢပူၤတနီနၥ်က့သူကသံၣ်အိၣ်ထီၣ်”န့ၣ်ဃိၣ်သၢဖျၢၣ်လီၢ်ကဝီၤဖိတဖၣ်စံးဝဲလီၤ။
တကးဒံးဘၣ် ရၤမတံ၊ဖၣ်အၣ် တကပၤ night club၊KTVဒီးသံးကျးတဖၣ် ဆါလီၤဝဲ လၢhi ဒၢးတဖၣ်ပူၤ Eကသံၣ်မူၤဘှီး၊Kကသံၣ်မူၤဘှီး၊ICE ကသံၣ်မူၤဘှီးတဖၣ်တဘျီအဂီၤ ကၠီၣ်တဲၣ်စ့ ၅၀၀၀/၈၀၀၀/၁၀၀၀၀ န့ၣ်သ့ၣ်ညါဘၣ်လီၤ။