စက်တင်ဘာလ ၂၊ ၂၀၂၆
ကရင်ပြည်နယ်ထဲက DKBA ဒီမိုကရေစီအကျိုးပြုကရင့်တပ်မတော်အဖွဲ့တွေ စိုးမိုးထားတဲ့ ဘုရားသုံးဆူ၊ ဝေါလေနဲ့ ဖလူး၊ မင်းလက်ပံလမ်းပိုင်းကို စစ်အုပ်စုကဝင်ရောက်အထိုင်ချတပ်စွဲနိုင်ဖို့ DKBA တပ်ဖွဲ့ ခေါင်းဆောင်တွေကို ဖိအားပေးတောင်းဆိုနေပါတယ်။
ပြီးခဲ့တဲ့ ဇူလိုင်လနဲ့ ဩဂုတ်လပိုင်းအတွင်းမှာ DKBAတပ်ဖွဲ့ ထိပ်ပိုင်းခေါင်းဆောင်တွေကို နေပြည်တော်စစ်အုပ်စုနဲ့ မော်လမြိုင် (ရတခ) အရှေ့တောင်တိုင်းစစ်အုပ်စုက ထိုင်း−မြန်မာနယ်စပ်က DKBA ထိန်းချုပ်စိုးမိုးတဲ့နေရာတွေကို စစ်တပ်ဝင် ရောက်အထိုင်ချတပ်စွဲနိုင်ဖို့ DKBA ထိန်းချုပ်စိုးမိုးတဲ့ မြို့ရွာတွေကို စစ်တပ်စိုးမိုးနယ်မြေအဖြစ်ဝင်ရောက်အထိုင်ချခွင့်ပေးဖို့ပြောဆိုတာတွေရှိနေတယ်လို့ သိရပါတယ်။
လက်ရှိမှာတော့ အဲဒီနေရာတွေမှာ KNLA မဟာမိတ်တပ်တွေနဲ့ စစ်အုပ်စုတပ်တွေ နှစ်ဘက်တိုက်ပွဲပြင်းထန်နေပြီး စစ်တပ်ကရှေ့တိုး စစ်ဆင်လို့မရတဲ့အခြေအနေ ၂နှစ်ကျော် ကြာလာချိန်မှာတော့ DKBA တပ်ဖွဲ့ကို စစ်တပ်ဘက်က စစ်ရေး၊ နယ်မြေထိန်းချုပ်နိုင်ရေးကို ဖိအားပေးတောင်းဆိုနေတာလို့ DKBA တပ်ဖွဲ့သတင်းအရင်းအမြစ်က ပြောပါတယ်။
“စစ်တပ်ကDKBA လူကြီးတွေကိုခေါ်ခေါ်တွေ့နေတာ ၃၊ ၄ ကြိမ်ရှိပြီ၊ (ရတခ)မော်လမြိုင်သွားလိုက် နေပြည်တော်သွားလိုက်၊ ဖုန်းနဲ့ ပြောလိုက်လုပ်နေတယ်၊ မင်းလက်ပံကိုတိုးမရတော့ DKBA တပ်ရင်း နေရာကို လက်နက်ကြီးပစ်ထည့်တယ်၊ ကျောက်ခက်ဗုဒ္ဓဂါယာ ကုန်းဘက်ကို လေယာဉ် နဲ့ဗုံးကြဲတယ်၊ စစ်တပ်က သုံးဆူနဲ့ ဝေါလေကို ပြန်တောင်းနေတယ်၊ ဖလူး၊ မင်းလက်ပံ၊ သုံးထပ်ကွေ့လမ်းပိုင်းနဲ့ ကျောက်ခက်ကို တပ်ပြန်ဝင်ထိုင်ဖို့ ဆိုပြီး ပြန်တောင်းနေတယ် ” လို့ DKBA တပ်ဖွဲ့သတင်းအရင်းအမြစ်က ပြောပါတယ်။
အဲဒီအခြေအနေအပေါ် DKBA တပ်မှူးတပ်ဗိုလ်တွေဘက်ကလည်း နယ်မြေအလိုက်ခေါင်းဆောင်တွေ ဆုံဆည်းမြိုင် DKBA ဌာနချုပ်မှာ စစ်အုပ်စုနဲ့ ငြိမ်းချမ်းရေးလုပ်ငန်းစဉ်တွေ၊ ဒေသတွင်း စစ်ရေးအခြေအနေနဲ့ တရုတ်ကျားဖြန့် ငွေလိမ်လုပ်ငန်းကိစ္စ ၊ စီးပွားရေးလုပ်ပိုင်ခွင့်ကိစ္စ၊ ဒေသဖွံဖြိုးရေးကိစ္စတွေကို ဆွေးနွေးကြတဲ့ အစည်းအဝေးတွေ ဆက်တိုက်လုပ်နေတယ်လို့ သိရပါတယ်။
အခုလို စစ်အုပ်စုပြန်တောင်းနေတဲ့ဘုရားသုံးဆူနဲ့ ဝေါလေဒေသတွေဟာ စစ်အုပ်စုအုပ်ချုပ်ရေးပျက်ပြားနေပြီး ဘုရားသုံးဆူ နဂါးတောင်ဗျူဟာနဲ့ ဝေါလေစစ်ဗျူဟာကုန်းတွေ ဟာ KNLA မဟာမိတ်တပ်တွေ ဝိုင်းပတ်ပိဆို့ ဖြတ်တောက်ခံထားရလို့ ပိတ်မိနေတဲ့စစ်စခန်း နေရာတွေဖြစ်နေတာ ၃နှစ်နီးပါးရှိနေပါပြီ။
လက်ရှိမှာတော့ ဖလူး၊ မင်းလက်ပံလမ်းပိုင်းနဲ့ ဝေါလေစစ်ဗျူဟာဘက်ကို စစ်တပ်က စစ်ကြောင်း ၅ ကြောင်း၊ အင်အား ၅၀၀ဝန်းကျင် နဲ့ ဖြန့်ကျက်တိုက်ခိုက်နေသလို KNLA မဟာမိတ်တပ်တွေကလည်း ပျောက်ကျားဗျူဟာနဲ့ ဖြတ်တောက်တိုက်ခိုက်နေတာမှာ စစ်တပ်ကမြေပြင်စစ်ကြောင်း တွေအထိနာတပ်လန်တာတွေရှိသလို လက်နက်ချဘက်ပြောင်းခိုလှုံတာတွေလည်းရှိနေတယ်လို့ KNLA မဟာမိတ်တပ်က ပြောပါတယ်။
အဲဒီလို စစ်တပ်ပြန်တောင်းနေတဲ့ ဘုရားသုံးဆူနဲ့ ဝေါလေမြို့ဘက်တွေကို စစ်တပ်ကိုပြန်ပေးမဝင်ရင် DKBA တပ် နေရာတွေကို လေကြောင်းဗုံးကြဲတာနဲ့ လက်နက်ကြီး ၊ ဒရုန်းတွေ တိုက်ခိုက်လာနိုင် တယ်လို့ စစ်ရေးအကဲခတ်တွေက သုံးသတ်တာမျိုးရှိနေပေမယ့် လက်ရှိမြေပြင်မှာတော့ စစ်အုပ်စုက စစ်ရေးနဲ့ ဖိအားပေးတာမျိုးဆက်လက်လုပ်ဆောင်တာမျိုးမတွေ့ရသေးပါဘူး။