ကီးတရံးဒီးကြုၤတုၤဝ့ၢ်သ့ၣ်တဖၣ်အပူၤ ပယီၤသုးခးလီၤကျိဖးဒိၣ်တပယူၤဃီ
လါယူၤလံ ၁၅သီ၊၂၀၂၃နံၣ် ကညီကီၢ်စဲၣ် ကီးတရံးဒီးကြုၤတုၤဝ့ၢ်သ့ၣ်တဖၣ်ပူၤ ခံခီခံကပၤတၢ်ဒုးကဲထီၣ်တအိၣ်၀ဲဘၣ်ဆၣ် ပယီၤသုးခးလီၤကျိဖးဒိၣ်ကိးမုၢ်နံၤဒဲးဟီၣ်ကဝီၤဖိတဖၣ်စံးဝဲန့ၣ်လီၤ ပယီၤသုးခီၣ်သုးရ့ၣ်(ခလရ–၉၇)ဒီးလ့ၣ်ဝကျိဖးဒိၣ်လုၣ်လၢအိၣ်ဆီလီၤသးဖဲကီးတရံး၀့ၢ်ပူၤတဖၣ်အံၤ ခးလီၤကျိဖးဒိၣ်ကိးမုၢ်နံၤဒဲးဆူ ကီးတရံးဝ့ၢ်အဃၢၢ် ကမဲၣ်ကိသဝီ၊ရွၣ်တဲရှ့ၣ်သဝီ၊မၠီးကၠၣ်အ့သဝီတဖၣ်တကပၤန့ၣ် ဟီၣ်ကဝီၤဖိတဖၣ်စံးဝဲန့ၣ်လီၤ “တနံၤန့ၣ်ပနၣ်ဟူဘၣ်အဆှၤကတၢၢ်အဖျၢၣ်၃၀ဃၣ်ဃၣ်လီၤ တဘျီတခီၣ်န့ၣ်နာ်ဟူဘၣ်ကျိဖိကလုာ် အါတက့ၤခးလီၤဝဲလၢအ့ရှါကျဲတကပၤသဝီတဖၣ်လီၤ တနီလီၤတဲၤဖဲဟံၣ်ဖီခိၣ်အဃိပှၤကညီဘၣ်ဒိအိၣ်”န့ၣ်ဟီၣ်ကဝီၤဖိစံးဝဲန့ၣ်လီၤ ခီဖျိခးလီၤကျိဖးဒိၣ်ကိးမုၢ်နံၤအဃိ ဟီၣ်ကဝီၤကမျၢၢ်တဖၣ် ကိးမုၢ်နံၤတၢ်ဖံးအီၣ်မၤအီၣ်မူကျိၤဝဲၤကွာ်အဂီၤတၢ်ကီတၢ်ခဲအိၣ်ထီန့ၣ် ဟီၣ်ကဝီၤဖိစံးဝဲန့ၣ်လီၤ…