ပယီၤသုးမီၤစိရိၤတဖၣ် ဘှီထီၣ်ဝဲသုးတၢ်အိၣ်ကဒုလီၢ်တဖၣ်လၢကြုၢ်တု-ကီးတရံးကျဲဒီးရၤလီၤသုးဂံၢ်ဘါအကယၤဃၣ်ဃၣ်ဒီးဟံန့ၣ်ဘံၣ်ဘၢ

လါယူၤ ၈သီ၊၂၀၂၆နံၣ်

ကညီကီၢ်စဲၣ် အ့ရှါကျဲက့ၤအိးထီၣ်အိၣ်ခံလါဃၣ်ဃၣ်ဒီးကြုၢ်တု-ကီးတရံးကျဲ သဝီတဖၣ် ပယီၤသုးဒိၣ်စိတန့ၣ်ဒံးအဃိ ကျဲမုၢ်ဒီဘီ သုးတၢ်အိၣ်ကဒုလီၢ်၊ကိၣ်ကရံၤဘဲၤကၣ်ဒီးသူၣ်ထီၣ်ဘှီထီၣ်ဝဲမ့ၣ်ပိၢ်တၢ်ပူၤတဖၣ်ဒီးကျဲဘံၣ်ဘၢအဂီၢ်ဟံန့ၣ်ဃးဝဲဂံၢ်ဘါအိၣ်လၢအကယၤန့ၣ် ပှၤနီသိလ့ၣ်လၢရၤမတံ-ဖၣ်အၣ်တဖၣ်စံးဝဲလီၤ။

ကြုၢ်တုဆူကီးတရံးတကပၤဂၠဲတိၤ၊ကြုၢ်တုဝ့ၢ်နုၥ်လီၤဟးထီၣ်၊ကၠိကလ့၊နွါခၠဲၣ်ကိ၊ညံၣ်ညၣ်သၣ်လ့၊ခၠီးတဲၤ၊ငါတဲၤ၊ခိၣ်နတဲၤ၊ကိတဲၤ၊တတါကၠိ၊နဘူကျဲဖး၊လဲၣ်ဝးသဝီကျဲတဖၣ် တၢ်လီၢ်လၢထံၣ်တၢ်ဖျါလီၢ် ဟံၣ်တဖၣ်သီခါဖၠၣ်ဒီးကျီးတဖၣ်ပူၤပယီၤဘှီထီၣ်သုးတၢ်အိၣ်သဒၢလီၢ်ဒီးအိၣ်ဆိးဝဲန့ၣ်ပှၤနီသိလ့ၣ်ဒိးလဲစံးဝဲ PRM လီၤ။

“လၢဂၠဲတိၤန့ၣ်လံဘှီထီၣ်ဘဲၣ်ကၣ်ဖးဒိၣ်တဖၣ် ဖဲန့ၣ်ဟဲထီၣ်လၢကီးတရံးတဆီ ဘိၣ်ဘံး DKBA BGF ဝ့အီၣ် ခမရ၅၄၅/၅၄၆သုး မ့ၤကျးတဖၣ်ကၠိတဖၣ်ပူၤသုးဖိအိၣ်လီၤ ပှၤကညီတအိၣ်ဆိးဟံၣ်တဖၣ်ပူၤနၥ်က့လဲၤအိၣ်ဝဲ လၢဟံၣ်အဂုၤအဂၤန့ၣ်မ့ၣ်အူအီၣ်ဟးဂီၤကွၥ်မးတဘူၣ်ဘၣ် သဝီဖိတဖၣ်နၥ်က့တက့ၤအိၣ်ဝဲဘၣ်”န့ၣ်စံးဝဲလီၤ။

တကီၢ်ခါခဲအံၤက့ၤအိးထီၣ်ဝဲ ကီၢ်ကၠီၣ်တဲၣ်-ကီၢ်ပယီၤ တိၤနီၢ်ဂံၢ်၂ဒီးပျဲကီၢ်ပယီၤတၢ်သူၣ်တၢ်ဖျးမုၣ်တဖၣ်ဆှၢထီၣ်ဆူကီၢ်ကၠီၣ်တဲၣ်တုၤလၢလါယူၤအသီ ၃၀ဒီးကီၢ်ကၠီၣ်တဲၣ်ဆူကီၢ်ပယီၤတကပၤတၢ်ဖိတၢ်လံၤလၢကဟဲနုၥ်တဖၣ်သမံသမိးဝဲတၢ်ခွဲးယၥ်လံၥ်အုၣ်သးတဖၣ်န့ၣ်လီၤ။

သိလ့ၣ်တီၤတၢ်ဖိတၢ်လံၤတဖၣ်ဟဲနုၥ်လီၤဆူကီၢ်ပူၤအလီၢ် စံးဝဲလၢဘၣ်ယိၤဝဲ KNLAသုးပၥ်ဖှိၣ်တဖၣ်ကခးဝဲအဃိဘၣ်ဟံန့ၣ်ဒိၣ်စိဟီၣ်ကဝီၤအဃိပၥ်လီၤတြဲၤဒီးဃ့စ့အိၣ်န့ၣ်ပှၤနီဘူခ့သိလ့ၣ်တဖၣ်စံးဝဲလီၤ။

“ပယီၤသုးဒီး DKBA BGF ပသစ တဖၣ်ထၢဝဲတိၤလဲ တြဲၤလဲ ကျဲလဲ တထၢဝဲဒၣ်သိလ့ၣ်ဟံၣ်တဖၣ်ဒီးပှၤဘၣ်ဃးဒီးကရူၤကရၢတဖၣ်န့ၣ်လီၤလၢအိၣ်လီၤတဲၤန့ၣ်ဘၣ်ဟံၣ်၅၀၀၀ ၁၀၀၀၀ တဘျီတခီၣ်တုၤလၢ၅၀၀၀၀လီၤ”န့ၣ်ပှၤနီသိလ့ၣ်စံးဝဲလီၤ။

တကးဒံးဘၣ်ကမျၢၢ်လၢဟးထီၣ်က့ၤလီၤတဖၣ် ပယီၤသုးတြဲၤ DKBAတြဲၤတဖၣ်ဃ့ဝဲလံၥ်အုၣ်သးဒီး smart card တဖၣ်ဝံၤမ့စိၤဝဲကၠီၣ်တဲၣ်ထုးထီၣ်တၢ်ဖိတၢ်လံၤတဖၣ်န့ၣ်ဟံန့ၣ်ဝဲဒီးဃ့စ့အိၣ်န့ၣ်သ့ၣ်ညါဘၣ်လီၤ။

တကီၢ်ခါခဲအံၤ ကြုၢ်တုကလံၤစိးသဝီတဖၣ်ဒီးကီးတရံးကလံၤထံးသဝီတဖၣ် တီနီၢ်ကစၢၢ်ဘိၣ်တဲအဖီလၥ်ကျဲ KNU သုးက့၆သုးက့၇ တကပၤ KNLAသုးပၥ်ဖှိၣ်တဖၣ်ဒီးပယီၤသုးတၢ်ဒုးကဲထီၣ်အိၣ်ကိးမုၢ်နံၤအသိးခံခီခံကပၤ ခးလိၥ်သးဒီးဒငိ ကျိဖးဒိၣ်တဖၣ်န့ၣ် သ့ၣ်ညါဘၣ်လၢ KNLAသုးဂံၢ်ခီၣ်ထံးတၢ်ကစီၣ်တဖၣ်အိၣ်န့ၣ်လီၤ။